‘n 34-jarige wyksraadslid van Pienaar verskyn vandag in die Kanyamazane Periodieke Hof op twee aanklagte van poging tot moord.
Die polisie in Mpumalanga sê ‘n onderonsie het Donderdag ontstaan tussen die pa van ’n 16-jarige meisie wat selfdood gepleeg het en die familie van haar oorlede ma.
Die familie was glo ongelukkig dat die pa hulle nie van sy dogter se dood verwittig het nie.
’n Familievriend, die raadslid, het tot die konflik toegetree en glo ‘n skoot afgevuur.
Dit het die pa sowel as ’n buurman, wat ook probeer het om in te gryp en die bakleiery te stop, getref.
Beide is hospitaal toe geneem vir behandeling.